看世事講台語"單元所有影片及文字，是公共電視及李江却台語文教基金會合作製作。歡迎大家 link 做非營利教學使用。

新聞標題：
台中陳家後壁古厝 百年庄頭強欲拆
拄好佇14期重劃區 地方向望保留古厝

諺語：田螺痛尾溜(Tshân-lê thiànn bué-liu)
佮『後悔莫及』仝意思；tsit-má一時歡喜，到路尾後悔都袂赴。

內文：

小朋友來到陳家後壁老厝
Sió-pîng-iú lâi-kàu Tân--ka āu-piah lāu-tshù
迎接in的是百年的老榕樹
gîng-tsiap--in-ê sī pah-nî ê lāu tsîng-tshiū
佮一个對唐山揹過來的石頭公
kap tsi̍t-ê tuì Tn̂g-suaⁿ phāinn--kuè-lâi ê tsio̍h-thâu-kong
聽講有兩百外年的歷史
thiaⁿ-kóng ū nn̄g-pah-guā nî ê li̍k-sú
小朋友攏感覺誠好奇
sió-pîng-iú lóng kám-kak tsiâⁿ hòⁿ-kî

老厝的塗埆是用田內底的塗一塊一塊做的
Lāu-tshù ê thô͘-kak sī īng tshân lāi-té ê thô͘ tsi̍t-tè tsi̍t-tè tsò--ê
抹壁的物件猶閣會當看著米糠的成分
buah-piah ê mi̍h-kiāⁿ iáu-koh ē-tàng khuàⁿ-tio̍h bí-khng ê sîng-hun
地動 風颱
tē-tāng hong-thai
百年來陪老厝的居民渡過每一工
pah-nî lâi puê lāu-tshù ê ki-bîn tō͘-kuè muí-tsi̍t-kang
老人講起囡仔時的記持
lāu-lâng kóng-khí gín-á-sî ê kì-tî
目睭攏光起來
ba̍k-tsiu lóng kng--khí-lâi

(陳家後壁厝居民陳成賢)
He塗埆創好濫濫咧
He thô͘-kak tshòng hó lām-lām--leh
用牛落去lok
īng gû lo̍h-khì lok
像這欲做古蹟留嘛無要緊啦
tshiūⁿ tse beh tsò kó͘-tsik mā bô-iàu-kín--lah
會使留
ē-sái lâu

(記者：你感覺伊的價值佇佗位? )
Lí kám-kak i ê kè-ta̍t tī tó-uī?
這馬無這號塗埆ah
Tsit-má bô tsit hō thô͘-kak--ah

佇台中市北屯的陳家後壁厝
Tī Tâi-tiong-tshī Pak-tùn ê Tân--ka āu-piah lāu-tshù
完整的部落群
uân-tsíng ê pō͘-lo̍k-kûn
原本是上百人的大庄頭
guân-pún sī tsiūⁿ-pah lâng ê tuā tsng-thâu
這馬嘛猶閣有三十外戶蹛佇內底
tsit-má mā iáu-koh ū saⁿ-tsa̍p-guā hō͘ tuà tī lāi-té
茅草蓋厝瓦、磚仔厝
hm̂-tsháu khàm tshù-hiā, tsng-á-tshù
每一个角落攏記錄著歷史的變遷
muí-tsi̍t-ē kak-lo̍h lóng kì-lo̍k tio̍h li̍k-sú ê piàn-tshian
猶閣有農村經濟的發展
iáu-koh ū lông-tshun king-tsè ê huat-tián
攏佇遮看著完整的縮影
lóng tī tsia khuàⁿ-tio̍h uân-tsíng ê sok-iánn

(台中市社區規畫師呂明聰)
這塗埆大概攏欲倚百年ah
Tse thô͘-kak tāi-khài lóng uá pah-nî--ah
以前猶無瓦鉼的時
í-tsîng iáu bô hiā-phiáⁿ ê sî
就是用茅草蓋厝頂
tsiū-sī īng hm̂-tsháu khàm tshù-tíng
你會當看著世代交替的跤跡
lí ē-tàng khuàⁿ-tio̍h sè-tāi kau-thè ê kha-jiah
就像一齣活的歷史
tō tshiūⁿ tsi̍t tshut ua̍h ê li̍k-sú
佇這个庄頭內底
tī tsit-ê tsng-thâu lāi-té

這一片佔地兩公頃的陳家後壁厝
Tsit tsi̍t-phiàn tsiàm-tē nn̄g kong-khíng ê Tân--ka āu-piah tshù
就佇台中市北屯的十四期重劃區內底
tō tī Tâi-tiong-tshī Pak-tùn ê tsa̍p-sì kî tîng-uē-khu lāi-té
寸塗寸金的市中心
tshùn-thô͘-tshùn-kim ê tshī-tiong-sim
綴重劃區欲動工
tuè tîng-uē-khu beh tāng-kang
面臨消失的命運
biān-lîm siau-sit ê miā-ūn
地方人士向望
tē-hng jîn-sū ǹg-bāng
至少會用得部份保留
tsì-tsió ē-īng-tit pō͘-hūn pó-liû

(國民黨台中市議員陳成添)
這巷仔 這馬保存一个
Tse hāng-á tsit-má pó-tsûn tsi̍t-ê
三合院情景的古厝
saⁿ-ha̍p-īⁿ tsîng-kíng ê kó͘-tshù
(台中市)這馬已經真少ah
(Tâi-tiong-tshī)tsit-má í-king tsin tsió--ah
kā伊編做公園預定地了後
kā i pian tsò kong-hn̂g ī-tīng-tē liáu-āu
予政府來做一个修護
hō͘ tsìng-hú lâi tsò tsi̍t-ê siu-hō͘
保存伊原來的面貌
pó-tsûn i guân-lâi ê bīn-māu

百年老厝的庄頭
Pah-nî lāu-tshù ê tsng-thâu
比袂過都市的開發
pí bē kuè to͘-tshī ê khai-huat
干焦會當透過政府的力量來介入
kan-ta ē-tàng thàu-kuè tsìng-hú ê li̍k-liōng kài-ji̍p
地方人士向望講
tē-hng jîn-sū ǹg-bāng kóng
予老厝變做公園
hō͘ lāu-tshù piàn-tsò kong-hn̂g
原地來保留
guân-tē lâi pó-liû
予伊成做一个活的百年庄頭
hō͘ i tsiâⁿ-tsò tsi̍t-ê ua̍h ê pah-nî tsng-thâu
毋通予一棟一棟的懸樓取代
m̄-thang hō͘ tsi̍t-tòng tsi̍t-tòng ê kuân-lâu tshú-tāi