法國知名運動用品店Decathlon首度登陸香港!!仲一口氣分別進駐旺角雅蘭中心地庫以及銅鑼灣柏寧酒店The Style House，售賣70項不同運動的用品和服飾。

靚雞雞話你知，之前我已經係淘寶幫襯呢個牌子，現在香港有專門店，即刻開心晒，唔使等運到，又可以直接試上身，唔驚唔啱SIZE！！

雅蘭店佔地2萬餘呎，你想像得到同想像唔到的運動都有，例如小兒料的跑步，游泳，羽毛球用品之類，仲有專門的騎馬，rugby等，令我大開眼界，當然仲有其他運動配飾如橡筋帶、健身手套、拳套、瑜珈墊袋等等。

價錢方面，真係平到笑，唔好自動波將佢變美金或歐羅，而係貨真價實的港紙，小背囊16蚊有交易，快乾毛巾$40（平過AEON呀喂～）

大人小朋友的用品都有，我著得落童裝150碼添!!好抵呀，暑假咁多夏日水上或戶外活動，可以帶埋小朋友一齊來掃貨喎！