G-Shock Smart Watch 2020 - G-Shock推出咗全新嘅 G-SQUAD GBD-H1000 ，比對Amazfit T-Rex 及 Garmin系列嘅智能手錶，GBD-H1000支援太陽能充電以及心率測量，仲有GPS功能，配合 G-Shock Move App，手機訊息提示都可以在 GBD-H1000上預覽。今日就同大家做個 GBD-H1000 開箱測試！

Casio 嘅 G-Shock 系列一直深受歡迎，但係去到智能手錶嘅領域，Casio 一直就用 Protrek 系列配合 WearOS 掛帥，而且款式唔多，G-Shock 迷都有啲失望。G-Shock 近日推出咗一系列嘅智能手錶，唔知又會唔會啱 G-Shock 迷嘅口味呢？

要介紹嘅就係呢款 G-SQUAD GBD-H1000 系列嘅 G-Shock 喇。秉承一貫 G-Shock 粗豪嘅風格，GBD-H1000 以招牌大錶面做生招牌，戴上手手感舒服，亦都相當型仔，除咗我手上面嘅全黑色之外，仲有另外三隻顏色選擇。200米防水、「襟」撞呢啲 G-Shock 基本功能就唔洗我多介紹，等我拍埋之前大熱款 Rangeman 俾大家睇睇......

有別於傳統嘅 G-Shock，GBD-H1000 配上反白點陣錶面顯示，配合背光嘅 LED 燈，更靈活顯示時間同埋唔同嘅資訊，相信係 G-Shock 系列智能錶嘅新標準。操作方面亦都同之前嘅 G-Shock 有啲唔同，以左面上、下兩粒掣作為選擇嘅選項，左面中間嘅大掣就係確定，操作似以前嘅功能手機，戴慣 G-Shock 嘅朋友可能要重新適應喇。另外，呢個系列亦都支援太陽能充電同埋 GPS 訊號接收，我哋都會為大家測試同埋介紹。

GPS 其中一個用途就係可以作全球對時，正常喺夠電量同埋室外陽光充足嘅情況之下，隻錶都可以自己以 GPS 較正時間，亦都可以人手，用 GPS 做對時個喎⋯⋯ 搞掂喇！

GBD-H1000 系列可以連接電話使用，換上咗新推出嘅 G-Shock Move 手機應用程式，而唔係用之前嘅 G-Shock Connected App，功能上亦有所提昇。等我下載呢個手機應用程式先！打開應用程式，就要先設定 Casio ID，都係輸入番簡單嘅個人資料，確認埋電郵，OK 喇！跟住就按畫面嘅指示，長撳手錶嘅左上掣，喺 Menu 揀番 Pairing、再撳 Connect，喺手機畫面再揀「新增」，咁就連接成功！第一次使用嘅時候輸入埋身高同體重，咁就用得！另外，手錶接駁咗手機，亦都會通過手機嘅時間作對時之用。

相信最多朋友關心嘅，就係 GBD-H1000 嘅訊息提示功能喇。當你接駁咗手機之後，當你嘅手機有提示訊息收到嘅時候，手錶就會同步收到相關嘅提示預覽，再入去就可以睇到訊息嘅詳情，繁體、簡體都一樣無問題㗎！另外，如果收到電話，呢隻錶亦都會發出提示接聽，雖然功能唔及 Android 嘅WearOS 同埋 Apple 嘅 watchOS 強，不過作為運動型嘅智能錶同埋日常使用，都足夠有餘啦！

好多朋友都鍾意戴住 G-Shock 做運動，究竟呢隻錶喺呢方面嘅功能得唔得呢？而心率測量嘅功能又掂唔掂？電力又夠唔夠呢？ 等我試多幾日，下集再同你講！

《Z世代達人》
麥卓華