小米 Xiaomi 喺 2021 年 3 月 29 號晚上舉行咗發佈會，宣佈推出小米11 Ultra 同小米 11 Lite，今日就同大家介紹下！

小米11 Ultra 機背使用陶瓷物料，而正面就係 6.81 吋嘅 WQHD+ AMOLED 四曲面開孔屏幕，支援 120Hz 更新率，同埋 480Hz 觸控採樣率。特別嘅係，佢喺機背後面嘅相機模組上，有一個 1.1 吋嘅AMOLED副屏幕，可以顯示信息、時間、同埋電量等等嘅資料，亦可以用嚟輔助用家使用主鏡頭自拍。有咗呢個副屏幕，以後大家如果要開Live，又要用主鏡頭，咁就容易得多，唔駛驚走位。 小米 11 Lite 就採用 6.55 吋嘅FHD+ AMOLED 屏幕，支援 90Hz 更新率，同埋 240Hz 觸控採樣率。

配置方面，小米 11 Ultra 配備高通 Snapdragon 888 處理器，支援 5G 雙卡雙待、屏幕指紋及 AI 人臉解鎖、IP68 防水等級、同埋支援 Wifi 6E 等等功能。另外，佢仲有由 Harman Kardon 認證專業調音嘅雙喇叭系統，提供優質嘅音效體驗。我哋試下開個有多行走馬燈嘅新聞節目睇下，完全無問題，非常流暢。

小米 11 Lite 就配備高通 Snapdragon 732G 處理器，並採用機身電源鍵結合指紋辨識嘅設計，支援 NFC 技術、雙卡雙待、及 micro SD 卡擴充儲存空間等功能。

Alfred 今日就嚟到西九海旁，同大家一齊睇下我用呢一部 Mi 11 Ultra 拍出嚟嘅日落景係咩樣。

拍攝方面，小米 11 Ultra 前置鏡頭有 2000 萬像素，而後置 3 鏡頭就由5000 萬像素嘅 Samsung GN2 CMOS 鏡頭、加 4800 萬像素超廣角鏡頭、同 4800 萬像素 5 倍光學變焦鏡頭組成，支援全焦 8K 拍攝、多機聯錄、超級夜景、魔法換天 3.0 同最高 120X 數碼變焦等功能，而佢喺 Dxomark上更獲得史上最高嘅 143 分，絕對係影相、廣角、同視頻上嘅王者。

而小米 11 Lite 嘅鏡頭都唔錯！佢前置鏡頭有 1600 萬像素，而後置 3鏡頭就由 6400 萬像素主鏡頭、800 萬像素超廣角鏡頭、同 500 萬像素長焦鏡頭組成，支援 4K 拍攝、一鍵換天、魔法分身等功能。

小米 11 Ultra 配備 5000mAh 嘅矽氧負極電池，支援 67W 有線及無線快速充電技術，同 10W 無線反向充電，代表用家可以使用呢部電話為其他裝置充電，夠晒實用！而小米 11 Lite 就有 4250mAh 嘅電量，支援 33W快速充電。

小米 11 Ultra 嘅內置 12GB RAM + 256GB 儲存空間，陶瓷黑版本喺香港定價 HKD $8499，正式推出日期待定。而小米 11 Lite 就有內置 6GB RAM + 128GB 儲存空間版本，定價 HKD $2199，珍珠黑將會喺 4 月 6 日正式發售，而糖果藍同埋蜜桃粉會於稍後推出。